ഓടം

കുട്ടികൾ കളിക്കുന്ന മുറ്റത്ത്
വല വിരുത്തിയിരുന്നു ഒരമ്മാമ്മ
'ഇപ്പോ വന്നതേയുള്ളൂ'
കേറ്റിവച്ചിരിക്കുന്ന ഓടം ചൂണ്ടി അവർ പറഞ്ഞു.

ഇമ്മാതിരി ഓടം 850 കൊല്ലം മുമ്പുള്ളതാണ്
85 വയസുള്ള ഈ അമ്മാമ്മ ഇതിലെപ്പോ പോയി വന്നു?

അപ്പോഴാണറിഞ്ഞത് അവർ ആ വീട്ടുകാരിയല്ല
സഞ്ചാരിണിയാണ്
പുറപ്പെട്ടിട്ട് 850 കൊല്ലമായി
അറബിയായി
ലന്തകാരിയായി
പരന്ത്രീസുകാരിയായി
ഇപ്പോൾ ഈ കുടിൽ മുറ്റത്ത്
ഒരു മുക്കുവത്തിയാകണം

കുറെ കഴിയെ
ഓടം തള്ളി പോകുന്നു അവർ
85 വയസുള്ള
850 കൊല്ലം മുൻപേ പുറപ്പെട്ട
ഒരമ്മാമ്മ